MALAOG sa 66,282 na mga paraadal sa kinder, elementarya, asin sekondarya o high school an yaon sa listahan kan Department of Education (DepEd) sa syudad nin Naga na piglaoman na nagpasiring ngonian na aldaw, Agosto 22, sa mga pampubliko asin pribadong eskwelahan sa laog kan syudad para sa pagpoon kan school year 2022-2023.
Segun ki City Schools Division Superintendent Mariano de Guzman, sa 29 na public elementary schools, 25 kaini an nakatalaan na mag-paotob nin full face-to-face classes asin apat an maadaptar nin blended learning mantang sa public secondary schools, 11 na eskwelahan an mapa-otob nin full face-to-face o in-person classes asin saro an maiimbwelto sa blended learning type of learning method.
Alagad, pigtawan du-on ni De Guzman na sa pagbunkaras kan bulan nin Nobyembre, an mga public and private elementary asin secondary schools sa Naga gabos na yaon sa full face-to-face classes.
Pigsaysay kan DepEd official na tolo man na public elementary schools (Carolina Elementary School, Teodora Moscoso Elem. Sch., asin Mac Mariano Elem. Sch.) an pig-report niya na sa DepEd central office para sa magkakanigong funding assistance huli kan mga classrooms na kaipuhan nang i-repair.
Sinabi pa ni de Guzman na dakulang tabang sa pagpapadagos ngonian na taon kan ereskwelahan an pagpahaman kan Yabu Elementary School, Sta. Cruz National High School, San National High School, asin Balatas National High School huli kan nagdudugang na mga enrolees.
Sinabi pa kaini na an apat na eskwelahan kabali man giraray sa planong tawan nin dugang na classrooms o school buildings huli kan nagdadakol na mga estudyantes orog na an Sta. Cruz National High School na tolong taon pa sana poon kan buksan kan taon 2020 igwa na tolos nin sobra sa 800 na mga paraadal.
(Jason B. Neola, CEPPIO.)
