OROG pang mapapahiwas an kaaraman sa pagpapaasenso kan komersyo asin toltol na paggobernar kan duwang syudad – Naga asin Calamba – huli kan nakatalaan na paghaman nin magayon na inter-city relationship pasiring sa marhay na pagserbisyo sa tao.
Ini an pigtawan nin du-on ni Konsehal Jose Perez pagkatapos na maheling niyang magigin mahiwas man an pagkanood kan mga Nagueño sa kultura kan ibang lugar siring kan mga taga-syudad nin Calamba. Laen kaiyan, sinabi pa kan konsehal na pwedeng makaresibe pa an syudad nin Naga nin mga adal gikan sa Calamba tanganing orog na mapangantad an mga programa para sa edukasyon.
An syudad nin Calamba sa probinsya kan Laguna iyo an kinamundagan kan national hero, Gat Jose Rizal na nagin kaibahan kan Bikolanong herowe na si Jose Panganiban bilang mga sikat na propagandista kan panahon nin kastila sa nasyon kan Pilipinas.
An sisterhood agreement kan LGU Naga asin LGU Calamba nakatalaan na gibohon sa Oktubre 24, ngonian na taon. Dae pa sana nahahaloy, an mga opisyales lokal kan Calamba City nagsungko sa syudad nin Naga huli kan saindang piggibong lakbay-aral dapit sa paggobernar.
(Jason B. Neola, CEPPIO.)
