NAGA CITY GOVERNMENT

City News

City of Naga, Bikol, Philippines : Today is  August 20, 2022

Limited in-person classes sa CCN popoonan sa Agosto 15

PARIL NA DALAN Dagos na sa Agosto 15, ngonian na taon, an pagsikad kan klase sa City College of Naga na yaon na ngonian sa permanenteng campus kaini harani sa Almeda highway.
PARIL NA DALAN Dagos na sa Agosto 15, ngonian na taon, an pagsikad kan klase sa City College of Naga na yaon na ngonian sa permanenteng campus kaini harani sa Almeda highway.

Bago kan pormal na pagsikad kan limited face-to-face classes sa City College of Naga sa Agosto 15, ngonian na taon, iyo an pagbendisyon sa eskwelahan na yaon na sa bago asin permanente kaining campus harani sa Almeda Highway sa Barangay Concepcion Pequeña. 

Pigsaysay ni Dr. Magno Conag, school administrator, pigdakit na sa bagong CCN campus an mga learning materials asin importanteng mga kasangkapan sa operasyon kan eskwelahan hali sa dating lugar kaini sa second floor kan building na okopado kan City Health Office sa City Hall compound.

Segun sa school official, mabukas nguna an eskwelahan para sa limited face-to-face classes mantang pighahalat pa kaini an opisyal na pagtugot kan Commission on Higher Education (CHED) para sa full implementation kan nasambit na traditional type nin learning instruction.    

Alagad, pigtawan du-on ni Conag na nakalatag na an mga magkakanigong health protocols kontra sa Covid-19, siring kan mga hand sanitation stations, temperature checks, mga reminders para sa pag otob kan physical distancing rule orog na sa laog kan mga classrooms.

“Dae maabot sa 50 na mga estudyantes an laog kan kada classroom. An freshmen o first year students igwa nin limang sections na igwa nin kagabsan na 216 estudyantes,” sabi kan school administrator.

Pigkakarkulong maabot sa 60 an bilang kan mga estudyantes na yaon sa 2nd year mantang nagpapadagos pa an enrolment para sa mga estudyantes na yaon sa 3rd asin 4th years na nagpoon kan Agosto 1 asin nakatalaan na magtapos sa petsa 12, aldaw nin Byernes.

(Jason B. Neola, CEPPIO.)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph