NAGA CITY GOVERNMENT

City News

City of Naga, Bikol, Philippines : Today is  August 15, 2022

Hanapbuhay sa basura para sa myembros kan informal waste sector

ECO-BAGS Si Maria Sonia Valdez (yaon sa wala) asin an duwa niya pang pag-iriba sa informal waste sector na imbwelto sa pagtahi nin mga eco-bags, pot holders, coin purses, asin door mats sa Solid Waste Management Office.
ECO-BAGS Si Maria Sonia Valdez (yaon sa wala) asin an duwa niya pang pag-iriba sa informal waste sector na imbwelto sa pagtahi nin mga eco-bags, pot holders, coin purses, asin door mats sa Solid Waste Management Office.

Orog na papakusogon pa kan gobyerno lokal kan syudad nin Naga an waste diversion program o an pagpakinabang liwat kan mga basura na pigpapaotob kan Solid Waste Management Office (SWMO).

An programa igwa nin duwang katuyuhan, enot, an pagtao nin hanapbuhay sa mga miyembros kan informal waste sector (IWS), asin an ikaduwa, tanganing mabawasan an volume kan basura na pig aapon sa sanitary landfill para sa halawig pang serbisyo kaini.

Kabali sa mga basurang pigre-recycle iyo an mga tarpaulins, mga tela na gikan sa mga ukay-ukay, asin mga plastic. Pigsaysay ni Richard Luna, acting property officer kan SWMO, partner kan saiyang opisina sa waste diversion an Market Enterprise and Promotions Office/Naga City People’s Mall na kun saen pigpapabakal an mga produkto na gikan sa basura arog kan shoulder bags, eco-bags, pot holders, door mats, asin mga wallet o coin purses.

Parte kan kwartang nakokoa kan mga myembros kan IWS piggigibong panggastos para sa saindang pang oro-aldaw na konsumo mantang pig-tatagama man an iba para pambakal nin mga materyales sa pagtahi kan mga nasambit na produkto tanganing makagibo nin mga bagong desenyo.

Saro sa mga miyembros kan IWS iyo si Sonia Valdez, sarong solo parent na igwang limang aki na pigbubuhay.  Walong taon na si Sonia bilang paratahi nin mga bags sa SWMO.

(JBN/DONPIO, CEPPIO.)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph