Edit
NAGA CITY GOVERNMENT

City News

City of Naga, Bikol, Philippines : Today is  October 3, 2022

Liga ng mga Barangay: Bayanihan sa Maogmang Lugar vs dengue

SI Ex-Officio City Councilor Corazon Peñaflor, presidente kan Liga ng mga Barangay, sa saiyang pakikipag-olay sa ibang myembros kan Sangguniang Panlungsod dapit sa synchronized rabuz na papartisiparan nin mga residentes asin opisyales kan 27 na barangay kan Naga. (JBN, CEPPIO/XERES GAGERO)
SI Ex-Officio City Councilor Corazon Peñaflor, presidente kan Liga ng mga Barangay, sa saiyang pakikipag-olay sa ibang myembros kan Sangguniang Panlungsod dapit sa synchronized rabuz na papartisiparan nin mga residentes asin opisyales kan 27 na barangay kan Naga. (JBN, CEPPIO/XERES GAGERO)

MAKUSOG na pigbobosol ngonian kan Liga ng mga Barangay sa syudad nin Naga an bayanihan laban sa dengue, sarong lagduan na pag-aksyon kan mga residentes kontra sa naglalakop na virus gikan sa kagat nin namok.

Sa saiyang privilege speech sa Sangguniang Panlungsod, pig-agda ni ex-officio city councilor Corazon Peñaflor, presidente kan Liga ng mga Barangay, an mga residentes asin mga opisyales kan 27 na barangay kan Naga na makipag-bayanihan tanganing matrayumpong maitolod an synchronized rabuz para sa kalinigan kan interong syudad.

An “Bayanihan kontra sa Dengue” o sarabay na paglinig sa kapalibotan, ipinagtalaan na gibohon sa kada ika-duwa asin ika-apat na Sabado kan bulan, poon ngonian na Agosto.

Pigpasalamatan ni Penaflor, Punong barangay kan Calauag, sa saiyang privilege speech si Alkalde Nelson Legacion huli kan suporta kaini kaibahan na an pagtugot kan alkalde na ilaog sa prosupwesto kan Liga an fundong magagastos sa gigibohon na synchronized rabuz.

An syudad nin Naga igwa nin nagsasakat na bilang nin mga kaso nin dengue poon kan Enero sagkod Hulyo 2022.  Sa records kan City Health Office Surveillance Unit, igwa nin 126 na kaso an nairehistro sa laog kan nasambit na peryodo, halangkaw nin 180% sa kaso kan kaparehong mga bulan kan nagtalikod na taon.

(Jason B. Neola, CEPPIO.)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph