Laen kan pagpasobli nin fundo para sa pagbangon kan negosyo, pirming pigsisyerto kan gobyerno-lokal kan Naga na matawan nin tabang an mga Nagueñong negosyante tanganing mapakusog pa an saindang mga negosyo.
An syudad igwang pigtagamang P10-M kan 2020 para sa mga beneficiaries kan Business Stimulus Program. Bago naubos an fundo kan Enero 2022, pigdugangan ini nin P7-M kan 2021 para sa pagpapadagos kan programa sa taon 2022.
Poon Setyembre 2020, maabot na sa P9.8-M an naipaluwas na fundo kan lokal na gobyerno para sa mga negosyong naipit kan pandemya. Kan poonan an pograma kan 2020 sagkod kan nakalihis na Hulyo 2022, igwa na nin 157 na negosyong pigtabangan an nasambit na programa. Kabali sa mga nagbenepisyo an 452 na mga tauhan o empleyado kan mga negosyante na padagos na nakakapagtrabaho.
Segun ki Benjamin Jose de Asis, project evaluation officer II kan Metro Naga Public Employment Service Office (Metro PESO), na mandato kan saindang opisina na tabangan an pag-asenso kan mga negosyo.
Sa lindong kan Business Stimulus Program, an LGU Naga nagtatabang sa mga negosyo sa paagi nin pagpasobli nin fundo na dae nin interes o zero-interest loans. Sa 157 na negosyo, 141 an padagos na nagbabayad mantang 16 an fully paid na.
Sa 16 na negosyong nakapagbayad na kan saindang loans, 7 an liwat na nagsobli nin kwarta tanganing dugangan an saindang kapital asin swelduhan na katabang sa negosyo.
(Jason B. Neola, CEPPIO. Retrato kua ni REY BAYLON, CEPPIO.)
