NAGA CITY GOVERNMENT

City News

City of Naga, Bikol, Philippines : Today is  August 15, 2022

Lider kan business sector sa Metro Naga proud sa e-Salvar kan ciudad

Padian Street, Naga City, Camarines Sur

Nagpahayag nin kaogmahan si Engr. Armando Aman kan maaraman niya na padagos an pagpaotob kan programang eSalvar sa laog kan ciudad nin Naga siring kan mga enot pang aldaw.

Pigsabi ni Aman na igwa nin dakulang bentaha o advantage an paggamit nin eSalvar QR Code ID sa paglaog sa arin man na edificio asin commercial establishments huli ta nairerehistro digdi an mga lugar na pigdumanan kan QR Code ID bearer o holder.

Huli kaini, segun ki Aman, nagiging pasil an monitoring asin tracing sa siisay man kun an gabos igwa nin QR Code ID, na pwedeng magresulta sa marikas na aksyon kabali na an paggibo nin mga paagi tanganing mapogolan an paglakop kan virus.

Laen kaiyan, dakula man an pagkakataon kan siisay man na igwang QR Code ID na maaraman kun baga naolakitan siya nin virus o dae huli ta naheheling sa eSalvar App kun baga si taong nakasalamuha niya positibo man nanggad o libredo sa Covid-19.

Sinabi pa ni Aman na an mga establisemyento sa NCR haros gabos na nag gagamit nin QR Code ID siring kan Pasig asin Muntinlupa asin tama lang na ipadagos an paggamit kaini sa ciudad nin Naga.

Mas pigpaboran ni Aman na gamiton an eSalvar ID asin bako an E-sulat na an boot sabihon isusurat pa kan mga tao an saindang mga pangaran asin iba pang impormasyon sa logbook bago maglaog sa sarong establisemyento.

“Mas dakula po an chance na magkaigwa kita nin contacts sa ibang tao kun magamit kitang papel asin logbook kesa QR Code ID,” segun ki Aman.

“Sa tahaw kan mga pagkontra, sa sadiri ko pong tindog asin pagtubod, magayon an implementasyon kan eSalvar,” sabi pa ni Aman.

Engineer Armando L. Aman, MNCCI President
Engineer Armando L. Aman, MNCCI President
Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph