KAPAKIPAKINABANG si piggibong consultative/coordination meeting kasoodma, Agosto 23, kan nagkakapirang grupo tanganing maibosol na toltol an laban kontra sa online sexual abuse and exploitation na pighahandalan posibleng mangyari man sa laog kan syudad nin Naga.
Pigsaysay ni Bise Alkalde Cecilia de Asis na kadakol nin inputs asin rekomendasyon na pigtao an mga imbitadong nagbali sa meeting na importanteng gayo sa paghaman nin sarong ordinansa na matao nin kapusugan asin organisadong paghiro tanganing maitolod an kampanya.
Alagad, sinabi kan bise alkalde na dakol pang sitwasyon an kaipuhan tawan nin konsiderasyon sa pagpasar nin ordinansa tanganing mai-implementar na marhay. Pigtaong halimbawa kaini na kaipuhan an ordinansa igwa nin pig-oopresir na livelihood, bako sanang pagtao nin penalidad o padusa, sa mga magurang na imbwelto sa online sexual abuse, exploitation nin mga aki.
“Igwa kayang mga magurang na minaggibo kan siring sa saindang mga kaakian huli kan grabeng pagtios,” sabi pa kan opisyal.
An laban kontra pang-aabuso asin exploitation kan mga kaakian, pigtotolod kan syudad nin Naga kaibahan an International Justice Mission, sarong international non-government organization na makusog na katuwang sa pagpaotob kan human rights, asin kan mga leyes na katakod kaini kaibahan na an law enforcement.
(Jason B. Neola, CEPPIO)
