Edit Content
NAGA CITY GOVERNMENT

City News

City of Naga, Bikol, Philippines : Today is  November 29, 2022

Business Stimulus Program ibobosol sagkod sa 2022

Pagpanao kan cheque sa mga beneficiaries kan Business Stimulus Program kan syudad
Presente si Mayor Nelson Legacion asin personal na pigduhol ni City Councilor Jose Perez, chairman kan SP Committee on Investment, Trade, Industry, and Economic Enterprise, an tseke, na igwang kantidad nin kwartang magagamit sa pagnegosyo kan sarong entrepreneur-beneficiary kan Business Stimulus Program.

Sa kamawotan na makatabang tanganing padagos na magin buhay an negosyo asin mabaskog an lokal ekonomiya dawa sa panahon nin pandemya, padagos na ibobosol kan Naga LGU an Business Stimulus Program sagkod sa masunod na taon kan 2022.

Ini an pigpahayag ni Florencio Mongoso Jr., pamayo kan Metro PESO, pagkatapos na kumpirmaron ni Alkalde Nelson Legacion sa management committee meeting kan Biyernes, Agosto 13, an implementasyon kan programa sagkod sa masunod na taon. 

Kan Mierkules, Agosto 11, kantidad nin P250,000 an pigpaluwas kan Metro PESO bilang free-interest loans sa apat na entrepreneurs kabali na an 11 mga empleyados asin empleyadas ninda. 

Sa paagi kan nasambit na programa, yaon na ngonian sa 141 gabos na mga enterprises o negosyo an pigsirbihan kan LGU Naga asin 465 na employees ninda.  An kantidad kan kwartang pigpasobli igwa nin total na P8.8-M.

Pigsaysay ni Mongoso na igwa pang tadang fundo na P1.2-M sa P10-M na pigtagama para sa pang-14 asin pang-15 na batches. 

Pigpahayag kan pamayo kan Metro PESO na pigkokonsiderar ni Alkalde Legacion na dagdagan an fundo para sa mga masurunod pang beneficiaries ngonian na taon.  Katakod kaini, pigsugo na kan alkalde an city budget officer na maghanap nin fundo para sa nasambit na katuyuhan.

Segun ki Mongoso, pigheheling kan alkalde an karahayan kun magtagama liwat nin P10-M an LGU para sa mga entrepreneur-beneficiaries kan kaparehong programa para sa masunod na taon 2022.

Pigtawan du-on pa ni Mongoso na nagiging maraot na sitwasyon kan Covid-19 cases sa Manila na posibleng padagos na magdara nin malaen na epekto sa mga probinsya na pwedeng makadamay o madanyaran an mga negosyong yaon sa mga banwaan asin syudad.   

An pagduhol kan zero-interest loan sa ika-13 na batch nin mga beneficiaries piggibo sa Pasalubong Center kan Naga City People’s Mall.  An apat compuesto nin mga negosyantes na imbwelto sa pag lechon, pagtienda nin mga pasalubong, asin duwa an maykagsadiri nin kakanan o kitchenette.

Share this

More News Stories

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph