Pigbaba na kan Palasyo Malacañan an Proclamation No. 1203 na pigdedeklarang special (non-working) day an Agosto 18, ngonian na taon, sa syudad nin Naga.
Pirmado ni Executive Secretary Salvador Medialdea, an Proclamation 1203 nagsasaysay na sarong special non-working day an maabot na Mierkules, Agosto 18, ngonian na taon, huli ta iyan an aldaw na pigroromdom an pagkagadan ni DILG Secretary Jesse M. Robredo, midbid bilang matibay na serbidor nin banwaan na nagdara nin mga pagbabago tanganing mabisto asin makamtan an marhay na paggobernar.
Pigpahayag bilang saro sa mga probisyon kan Proclamation 1203 an pagserbi ni Robredo bilang alkalde kan Naga poon 1988 sagkod 1998 asin kan 2001 sagkod 2010 na danay an dedikasyon asin pagkamoot sa saiyang mga konstituentes.
Pigsasabi pa sa nasambit na kasuguan na huli kan saiyang marhay na paninirbihan o outstanding performance bilang alkalde kan syudad nin Naga, pigtao ki Robredo an Magsaysay Award for Government Service kan 2000, siya an primerong Pilipinong alkalde na pigtawan kan siring na pagbisto.
An Proclamation 1203 pirmado ni Executive Secretary Salvador Medialdea sa pagtugot o authority na itinao ni Presidente Rodrigo Duterte.
Sinabi ni Medialdea na huli kan pirming pagromdom kan mga Nagueño sa mga marhay na ginibo kan dating alkalde asin depuntong DILG Secretary, tama asin dapat lang soboot na itao sa mga taga-Naga an oportunidad na matawan nin pagrespeto asin lugar an pagromdom ki Robredo sa paagi nin pagkonducir nin aktibidades na dae mabalgar sa mga pigpapaotob na public health measures.
