PASIRING sa pagiging normal kan dalagan nin negosyo sa syudad nin Naga an pagbosol kan mga civic events na parte kan Peñafrancia fiesta ngonian na taon. Ini an pigtawan du-on ni City Councilor Joselito Del Rosario, chairman kan Committee on Boy Scouts and Girls Scouts parade asin Drum, Lyre, and Majorette competition na ipinagtalaan sa Setyembre 14, aldaw nin Miyerkules.
Pigsaysay kan opisyal na hagad kan lokal na gobyerno kan Naga na dagos-dagos nang magin normal an operasyon kan mga industriya orog na an mga negosyong igwa nin relasyon sa pagpapakusog kan turismo sa laog kan syudad.
Nagpahayag nin pagtubod si Del Rosario na dae masasayang an paghigos kan syudad na manteniron an alert level 1 huli kan nakatalaan na selebrasyon kan pyesta, sinabi kaini na makusog na pigpapaotob man giraray kan syudad an mga health protocols asin reglamento kabali na an pagmantenir kan halangkaw na herd immunity tanganing masyerto na ligtas sa Covid-19 an tao.
An syudad nin Naga igwa nin pigtagamang P8-M bilang panggastos sa mga civic activities ngonian na pyesta.
(Jason B. Neola, CEPPIO.)
