Edit
NAGA CITY GOVERNMENT

City News

City of Naga, Bikol, Philippines : Today is  October 7, 2022

200 tons nin basura sa Naga kada aldaw sa selebrasyon kan pyesta

ANDAM an SWMO sa 250 toneladang basurang iwawalat kan pag selebrar kan Penafrancia fiesta.
ANDAM an SWMO sa 250 toneladang basurang iwawalat kan pag selebrar kan Penafrancia fiesta.

PIGPOPOONAN nang bilogon kan Solid Waste Management Office an mga estudyanteng volunteers asin pag-iriba sa Informal Waste Sector bilang parte kan pag-andam para sa marikas asin lagduan na pagponpon nin basurang dara kan mga darakulang events kan Peñafrancia fiesta.

Pigkakarkulong maabot sa 200 hangan 250 tons na basura an kaipuhan na tiponon kan SWMO sa aldaw lang nin traslacion procession. 

Kun ordinaryong aldaw, an SWMO nakakakolekta nin 94.23 tonelada nin basura.  Sa nasambit na numero, 61.62 tons an recyclable materials mantang 32.61 tons an pigdedeklarang residual waste na minadalagan sa sanitary landfill. 

Sinabi ni Engr. Joel Martin, pamayo kan SWMO, an 200-250 tons nin basura iyo man an makokolekta kada aldaw pagkatapos kan mga darakulang events, siring kan: military parade, fluvial procession, civic parade, asin iba pang civic and religious activities sa panahon kan pyesta.  Laen pa kaiyan an mga basurang dara kan mga transient vendors.

Alagad, sinabi ni Martin na igwang sobra sa 450 na mga volunteer-students hali sa mga eskwelahan asin myembros kan Informal Waste Sector an madamay sainda sa pagtipon asin pagdispatsa nin mga basurang yaon sa mga tinampo na lalagan nin mga dugang na basurahan.

Pigpasalamatan ni Martin an mga eskwelahan kan UNC, CBSUA, Mariners Polytechnic Colleges, USI, AdeNU asin Naga College Foundation huli kan saindang pakikisumaro na maibosol tolos an kalinigan kan syudad pagkatapos sana kan selebrasyon.

(Jason B. Neola, CEPPIO)

Share this

More News Stories

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph