PASADO sa Sangguniang Panlungsod an resolusyon ni City Councilor Ghiel Rosales na nagmamawot na pangarogan an lokal na gobyerno, Archdiocese of Caceres, business sector asin civil society groups sa environmental responsibility sa Peñafrancia fiesta.
Segun ki Rosales, chairman kan Committee on Environment and Energy kan Sanggunian, maninigo na magin pangarogan an syudad sa reduction kan single use na plastic decorations, food packaging asin disposable plastic cups, spoons and forks sa paagi kan pagpangalad sa paggamit nin mga nasambit na produkto na may maraot na epekto sa kapalibutan.
Pigtawan-doon ni Rosales na sobra sa doble an dakol kan basura sa syudad na nakolektar kan Solid Waste Management Office kada pyesta kumpara sa mga ordinaryong aldaw.
Piglalaoman na mag-abot sa estimated number na 200 sagkod 250 tonelada nin basura an mahahakot kan nasambit na opisina sa mga aldaw kan pigtalaan an civic and religious events katakod kan pyesta.
(Paulo Delos Santos, CEPPIO. Retrato hale sa SWMO.)
