LIWAT na mapasiring sa University of Nueva Caceres sa aga, aldaw nin Miyerkules, Setyembre 20, an labi sa 500 na mga Bar examinees para sa ikaduwang aldaw na Bar examinations.
An aktibidad pinunan kan Setyembre 17 sa nasambit na unibersidad na kun saen pigtawan nin bwelo an pagdagsa kan mga makoa kan exams gikan pa sa manlaenlaen na banwaan asin probinsya kan Bikol.
Sinabi ni Renne Gumba, bilang namomoon sa pagtao nin external support sa aktibidad asin pagsyerto kan seguridad kan mga bisita, na mantenido ninda an pagpapaotob nin mga lakdang tanganing mapangatamanan an kaligtasan kan mga future barristers asin katoninongan sa piggibo kan 2023 Bar Exams.
Ipinahayag kan security group kan unibersidad na andam na sindang magbukas sa agang amay poon alas 4:00 nin mag aagahon para akomodaron an mga Bar examinees asin Bar examiners.
Segun ki Gumba mas dakula an numero kan mga Bar Examinees ngonian kaysa sa duwang nakaaging Bar exams. Nagtao nin asigurasyon an opisyal na padagos na maoperar an Joint Operations Center (JOC) sagkod na dae pa tapos an Bar examinations.
Pigpasalamatan man kaini an medical teams kan LGU Naga, an traffic management kan Public Safety Office, asin Naga City Police Office siring man security and peace and order task group Joint Operation Center.
An Bar exams nakatalaan na matapos sa Domingo, Setyembre 24, 2023.
Jason Neola, CEPPIO
