PIRMADO ni Alkalde Nelson Legacion an Executive Order No. 2021-032 na nagbilog sa Task Force Paputok 2021 na mapaotob kan mga panundon kan gobyerno lokal asin mga ahensiya kan gobyerno sa pagpabakal nin mga paputok.
Nagkapira nang street vendors an nag-pahayag nin interes na magtinda nin manlaen-laen na klase nin paputok na pigtutugot ipabakal sa merkado basado sa R.A. 7183. Sakop kan nasambit na ley an pagpabakal, manufacturing, distribution, asin pag-gamit nin paputok asin iba pang pyrotechnic devices.
Segun ki Renne Gumba, Public Safety Officer, obligado an mga matyenda nin paputok na mag apply nin permit asin lisensya sa Bureau of Fire Protection asin Philippine National Police. Apwera pa kaiyan, an mayor’s permit asin iba pang dokumentos na nagtataong permiso asin sertipiko na magtyenda.
Dugang ni Gumba, imbitado an mga firecracker vendors na mag atendir sa mga orientation seminars kan lokal na gobyerno manungod sa mga rules and regulations na maninigong sunudon.
Si Gumba asin si Market Superintendent Ramon Florendo an namamayo sa pigbilog na pwersa, kaiba an City Health Office, City Environment and Natural Resources Office, City Treasurer’s Office, Naga City Police Office, Department of Interior and Local Government, City Disaster Risk Reduction and Management Office asin Bureau of Fire Protection.
Pigsabi pa ni Gumba, arog kan mga nakalihis na holiday seasons sa gilid kan Naga River harani sa Naga City People’s Mall an pigtaong lugar sa mga vendors na mapabakal nin paputok.
An mga paputok asin pailaw na pigtutugot ipabakal basado sa ley iyo an mga minasunod:
- Baby rocket
- Bawang
- Pulling of Strings
- Paper caps
- El Diablo
- Watusi
- Sintoron ni Judas asin
- Kwitis
An mga pyrotechnic devices o pailaw na pigtutugot na ipabakal basado sa ley iyo an:
- Sparklers
- Luces
- Fountain
- Mabuhay
- Roman candle
- Trompillo
- Airwolf
- Whistle device
- Butterfly asin iba pa.
