IMBITADO an lambang lalaki na mawot mag partisipar bilang mga voyador sa Traslacion procession sa Setyembre 9 na magparehistro sa kanya-kanyang parokya tanganing ilista bilang myembros kan Confradia de San Jose.
Segun ki Rev. Fr. Pablo Carpio, parish priest na naka assign sa Basilica Minore, susug sa joint statement kan Arkidiyosesis kan Caceres asin kan lokal na gobyerno kan syudad nin Naga, mga myembros sana kan confradia an tutugutan na magdara sa mga andas kan Mahal na Ina asin El Divino Rostro.
Pigtawan-doon kan padi na mababalgar an health protocols na ipapasunod sa nasambit na aktibidad kun tutugutan na magroso sa mga andas an mga voyador, na dae man kabale sa organisasyon, siring sa kinatudan bago magtama an pandemya.
Dugang ni Carpio, isasairarom sa maninigong formation asin instructions an mga myembros kan confradia para sa ligtas asin solemneng Traslacion procession na iyo mismo an kamawotan kan simbahan
(Paulo Delos Santos, CEPPIO. Retrato hale ki Deng Malate.)
