Edit Content
NAGA CITY GOVERNMENT

City News

City of Naga, Bikol, Philippines : Today is  December 1, 2022

Public presentation kan annual plan, budget nagpapadagos

SI Annabel Vargas (nakatindog), CSWDO chief, mantang pigpepresentar sa publiko asin sa mga miyembros kan Naga City People’s Council an prosopuesto o budget na kaipuhan kan saindang opisina sa masunod na taon kan 2023.

Padagos na piggigibo ngonian kan mga opisina na yaon sa lindong kan gobyerno-lokal kan Naga an public presentation kan saindang mga proposed budgets asin mga plano na nakatalaan gibohon para sa taon 2023.

An aktibidad parte kan governance processes kan syudad na kun saen bukas sa publiko an orolay dapit sa paghaman nin annual budget kaibahan na an orolay sa gagastusan na mga aktibidad, programa, asin proyekto na nakatalaan ipaotob o gigibohon sa masunod na taon.

Segun ki City Budget Officer Francisco Mendoza, igwa nin pagtubod an local finance committee kan syudad na mababa nin haros P200-M an kainteruhan na annual budget kan lokal na gobyerno dara kan paghuros sa pundo na pigbababa kan gobyerno nasyunal sa mga LGUs sa paagi kan National Tax Allocation (NTA) huli kan maraot na epekto kan pandemya sa ekonomiya.

Huli kaiyan, an nakalihis na annual budget kan syudad na P1.4-B posibleng magin P1.2-B na lang para sa 2023.

Sa oras na mahaman na an 2023 annual budget, pigtawan du-on ni Mendoza na maheheling man giraray na dakula ang pundo na nakatagama sa basic services, siring kan programa sa edukasyon, asin salud, nutrisyon, kabali na an mga programang makakapagtao nin empleyo sa Nagueno.

(Jason B. Neola, CEPPIO)

Share this

More News Stories

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph