Edit Content
NAGA CITY GOVERNMENT

City News

City of Naga, Bikol, Philippines : Today is  December 3, 2022

Mga harong na nagigin “temporary shelter” tuyong may bagyo ipapasenso sa barangay

MGA evacuees na pigpatiripon ni Liga ng mga Barangay President Maria Corazon Peñaflor sa Barangay Hall kan Calauag. (Ramil Herrera, CEPPIO)
MGA evacuees na pigpatiripon ni Liga ng mga Barangay President Maria Corazon Peñaflor sa Barangay Hall kan Calauag. (Ramil Herrera, CEPPIO)

Mantang apresyado kan syudad an pagpadagos kan mga piling residensya sa saindang mga pagtaraid na madadanyaran kan bagyo bilang mga evacuees, nagtaong abiso si City Social Welfare and Development Officer Annabel Vargas na kaipuhan ining ma-assess kan saindang opisina para maseguro an kaligtasan kan gabos — kan nagpadagos asin kan pinadagos na mga tawo.

Segun ki Vargas, maninigong mailista nguna an mga residensya kan barangay asin maisumeter nguna sa saindang opisina para mahiling ang actual capacity na pwedeng akuon na pwedeng evacuees para sa maninigong alokasyon nin relief goods.

Sa ngonian, an mga nag ebakwar sana sa mga designadong evacuation centers an prayoridad sa distribusyon kan emergency food packs susog sa pigpapautob na panundon.

Dugang ni Vargas, apwera sa barangay, hahagadon man ninda an sa tabang kan City Engineer’s Office (CEO) para hilingon an building integrity kan mga harong.

Mantang pigsusurat an baretang ini, pigkakarkulong 875 pamilya, kompwesto nin 3,147 indibidwal an naebakwar kan Incident Management Team – TS Paeng. Aminado si Vargas na dae pa kompleto an nasambit na datos kaya padagos an saindang paghalat sa reports gikan sa mga barangay dapit sa mga dugang na evacuees.

(Paulo Delos Santos, CEPPIO)

Share this

More News Stories

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph