NAKATALAAN nang bendisyonan asin magamit an Naga City Event and Evacuation Center II sa Balatas New Development Area sa aga, Oktubre 18, alas-8:00 nin aga bago gibuhon an First 100 Days Report ni Alkalde Nelson Legacion.
An fondong nagkakantidad P50 milyones na piggamit sa pagpatugdok kan edipisyo gikan sa Philippine Amusement and Gaming Corporation na pighagad kan alkalde para sa dugang na infra project sa syudad nin Naga sa irarom kan saiyang administrasyon.
Pormal na pigresibe an fondo kan lokal na gobyerno kan Nobyembre 12, 2021 sa groundbreaking ceremony na piggibo sa nasambit na lugar.
An evacuation center na may duwang eskalon asin floor area na 2000 square meters gagamiton man sa sports program asin iba pang mga aktibidad kan lokal na gobyerno.
(Paulo S. Delos Santos, CEPPIO)
