Pagkatapos na mamatean kan publiko an kawaran nin magkakanigong supply nin tubig sa laog nin nagkakapirang aldaw sa syudad nin Naga, nagbutas nin asigurasyon si General Manager Florencio Mongoso Jr. kan Metro Naga Water District (MNWD) na magiging marhay an bolos kan mga gripo sa panahon nin pyesta.
Pigsaysay ni Mongoso na an nakalihis na problema sa supply nin tubig parte kan saindang pag-andam na magin makusog pa an bolos kaini bilang preparasyon sa dakulang selebrasyon ngonian na Setyembre.
Laen kan pagribay nin mas dakulang makina o motor sa pumping station 1 kan Barangay Cararayan, liwat na pigpaandar kan Metro Naga Water District (MNWD) an pumping station 5 sa nasambit na barangay. Segun sa general manager, haloy nang panahon na dae napapakinabangan an pumping station 5 sa Cararayan. Kasunod kan nasambit na patrabaho, iyo an paghirahay kan pumping station sa Barangay Mabolo.
Naglalaom si Mongoso na makakatao nin bastanteng supply nin tubig an tolong pumping stations bako sana sa panahon kan nagdadangadang na pyesta.
Sa ngonian, pigsisibotan kan MNWD an water supply adjustment tanganing syertuhon an balansyadong distribusyon kan tubig sa 27 na mga barangay kan syudad.
Kabali pa sa pigsisibotan an tamang paglaag nin water pressure tanganing mapabolosan nin tubig magin an mga harong o komunidad na harayo o igwa nin distansya sa mga pumping stations.
Nagpahayag nin paglaom si Mongoso na huli kan pag-uran igwa nin marhay na spring water production, sarong dakulang tabang tanganing madugangan an groundwater level asin maotob an water supply requirement kan mga concessionaires.
Pigpahayag pa kaini na nakaandam man an mga lorry kan water district para sa mga biglaan na pangangaipuhan sa tubig laen pa kan fire truck na pigsobli kan MNWD sa Bureau of Fire Protection na pigpoonan nang i-disinfect tanganing lagan nin tubig na pwedeng mainom.
(Jason B. Neola, CEPPIO.)
