KAIPUHAN nagresibe dawa sarong booster dose nin anti-Covid-19 vaccine an sarong aplikante na boot magin kandidata sa Miss Bicolandia Beauty Pageant. Ini an pigtawan nin du-on ni City Councilor Sonny Rañola, M.D., chairman kan 2022 Miss Bicolandia Executive Committee (ExeCom), sa press briefing kasobago.
An pagkakaigwa nin booster shot kan anti-Covid-19 vaccine saro sa mga mga kalipikasyon tanganing akoon an sarong aplikante na magin kandidata sa prestihiyosong beauty contest.
An Miss Bicolandia Beauty Pageant nakatalaan gibohon poon 7:00 nin banggi hanggan 10:00 nin banggi sa Setyembre 7, ngonian na taon, sa Jesse M. Robredo Coliseum.
An makokoronahan bilang Miss Bicolandia maresibe nin P250,000 asin sash mantang an First Runner-Up maresibe nin P150,000 asin sash; P75,000 asin sash sa Second Runner-Up; sash asin P50,000 sa Third Runner-Up; asin P25,000 asin sash sa Fourth Runner-Up.
Segun sa ExeCom, laen kan nasambit na mga premyo, an mga manggaganang kandidata maresibe pa nin mga special awards para sa mga minasunod na titulo na igwang kabale na premyong P7,000 cash: Best in Production Number, Best in Swimsuit, Best in Evening Gown, Miss Photogenic, asin Miss Congeniality. An mapipiling “Darling of the Press” makakaresibe nin P5,000 na premyo.
An criteria na babasehan kan pagpili nin mga magiging official candidates: Personality and Intelligence, 40%; Beauty of the face, 30%; asin Form and Figure, 30%.
An criteria para sa swimsuit competition: Form and Figure, 40%; Poise and Projection, 40%; asin Confidence, 20%. Sa evening gown competition: Elegance, 40%; Poise and Projection, 40%; asin Over-all Impact, 20%.
(Jason B. Neola, CEPPIO)