DEL GALLEGO, Camarines Sur — Nagin mas inspirado asin high morale an pwersa kan Forward Control Point sa banwaan nin Del Gallego pagkatapos na bisitahon sinda ni Alkalde Nelson Legacion kan nagtalikod na semana.
An Forward Control Point na yaon na ngonian sa ika-31 aldaw padagos sa saindang operasyon tanganing siertohon na pigootob na toltol kan mga returning residents asin iba pang mga biyaheros na boot maglaog asin magtenir sa ciudad nin Naga an mga health protocols kontra Covid-19.
Yaon an presencia kan alkalde sa lugar kan Naga City Forward Control Point na yaon sa may lenderos kan Del Gallego (Camarines Sur) asin Quezon tanganing aramon an sitwasyon sa nasambit na lugar. Segun sa report ni Renee Absalon Abiada, Asst. CDRRMO, an control point sa ika-31 aldaw kaini, nakapagsitar asin naggibo nin aksyon sa 1,001 returning residents, 1,087 Naga-bound authorized persons outside residence (APOR), asin 370 na returning residents na pig obligar na magsairarom sa home quarantine.
309 an isinairarom sa antigen testing mantang 6 an nadiskubreng positibo sa Covid-19. An duwa sa anom pigpasairarom giraray sa RT-PCR swab test asin naghahalat pa kan resulta.
Huli kan organisado asin magayon na dalagan kan operasyon, pig omaw kan alkalde an FCP personnel asin pigsabihan na pigpapasalamatan sinda kan kapwa ninda mga Nagueno.
