Edit Content
NAGA CITY GOVERNMENT

City News

City of Naga, Bikol, Philippines : Today is  December 2, 2022

Fast lane durante kan Bar exams sa Naga binukasan

DAGOS nang binukasan an Bayawas St. na binabanga kan Barangay Abella asin Sta. Cruz makalihis na aprobaran kan Korte Suprema an kahagadan kan Naga City Police Office na gibuhon na sanang fast lane an tinampo na kun saen makukua an Gate Two kan University of Nueva Caceres (UNC).

Enot digdi, nagpaluwas na an lokal na gobyerno nin abiso sa publiko mapadapit sa road closure na ipapasunod durante kan bar examinations sa Nobyembre 9, 13, 16 asin 20. Kabale sa naenot nang abiso an Bayawas St. na piggibong parking spaces kan mga examinees, personahes kan Korte Suprema na mamando kan eksaminasyon asin empleyados kan eskwelahan.

Segun ki Police Lt.Col. Errol Garchitorena, Deputy City Director for Administration kan PNP-Naga, gagamiton an Gate Two kan UNC sa oras nin emerhensiya siring man an tinampo bilang fast lane.

Lininaw ni Garchitorena na bukas man an Kalye Bayawas sa mga motorista alagad presente an kapupulisan asin Public Safety Office na iyo an mamando sa bulos nin trapiko sa lugar.

Sinabi pa ni Garchitorena na ipapangalad an pag-garahe kan mga lunadan sa mag-ibong na parte kan tinampo.

Matenir na sarado sa mga nasambit na petsa, alas-12:00 nin agas sagkod alas-7:00 nin banggui an Gen. Luna St., J. Hernandez St., porsyon kan Barlin St. poon sa kanto kan Naga City Police Office, Arana St., P. Burgos St. asin mga kalye kan Talisay, Narra asin Bagong Lipunan, gabos sa Barangay Sta. Cruz. Gagaramiton an mga nasambit na kalye bilang parking spaces kan mga examinees, personahes kan Korte Suprema asin mga empleyado kan UNC.

Kinakarkulong 460 examinees sa Bicol an masairarom sa bar examinations sa unibersidad na liwat pinili kan Korte Suprema bilang sentro kan examinasyon sa Bicol, ngonian na taon.

AN bilog na pwersa kan Incident Management Team Bar Exams 2022 sa saindang final meeting na piggibo sa laog mismo kan UNC, sarong aldaw bago poonan an bar examinations. (Donpio Poñado, CEPPIO)
AN bilog na pwersa kan Incident Management Team Bar Exams 2022 sa saindang final meeting na piggibo sa laog mismo kan UNC, sarong aldaw bago poonan an bar examinations. (Donpio Poñado, CEPPIO)

(Paulo S. Delos Santos, CEPPIO.)

Share this

More News Stories

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph