AARAMON kan Committee on Consumer Protection kan Sangguniang Panlungsod kan Naga an rason kun taano ta pirming halangkaw an presyo kan karneng orig sa merkado. Huli kaiyan, gigibohon kan nasambit nang committee an sarong meeting kaibanan an mga stakeholders sa industriya nin orig.
Segun ki City Councilor Jesse Albeus, chairman kan committee on consumer protection, dakol sindang pigreresibeng reklamo asin mga hapot kun taano ta halangkaw an presyo kan nasambit na produkto kesa sa presyong pig-oopresir kan mga merkado sa pagtaraed na banwaan.
Sa Naga asin pagtaraed na banwaan, P130 hanggan P160 an kilo kan buhay na orig o an pig-aapod na live weight, alagad an presyo kan karneng orig (pork) sa Naga City People’s Mall asin sa mga satellite markets sa laog kan syudad, abot nang P320 sagkod P360 per kilo mantang sa luwas kan Naga, P260 hanggan P300 sana an kilo.
Pigtawan du-on ni Albeus na mandato kan saiyang komitiba na pangatamanan asin tawan nin proteksyon an mga konsumidores bako sana sa ngaran kan pagbakal nin marhay na produkto, alagad magin man sa presyo kan babakalon nindang produkto.
Segun pa sa konsehal, mantang pighahalat niya an executive order ni Mayor Nelson Legacion na iyo an babasehan sa liwat na pagbilog kan Naga City Price Coordinating Council, idadagos niya na an pag-aram sa istorya kan halangkaw na presyo nin pork sa laog kan Naga bilang chairman kan nasambit na komitiba.
Nakatalaan alokon ni Albeus na mag atendir sa meeting na gigibohon sa Byernes, alas 2:00 nin hapon an mga representante kan nagkakapirang mga opisina nin gobyerno asin pribadong grupo, siring kan Naga City Fresh Meat Vendors Association, an opisina rehiyunal kan Department of Agriculture sa Bicol, an National Meat Inspection Service, Market Enterprise and Promotion Office, Naga City Abattoir, asin an grupo nin mga konsumidores.
Pinakiolayan man ni Vice Mayor Cecelia de Asis si Albeus na ibali na an isyu dapit sa nagsasakat man na presyo nin manok asin sogoc.
(Jason B. Neola, CEPPIO.)
