NAGA CITY GOVERNMENT

City News

City of Naga, Bikol, Philippines : Today is  September 24, 2022

Consultation meeting, ordinansa vs sexual exploitation of children

SI Vice Mayor Cecilia de Asis sa saiyang pakikipag olay sa myembros kan City Hall Press Corps dapit sa magiging aksyon kan lokal na gobyerno kontra sa online sexual child molestation.
SI Vice Mayor Cecilia de Asis sa saiyang pakikipag olay sa myembros kan City Hall Press Corps dapit sa magiging aksyon kan lokal na gobyerno kontra sa online sexual child molestation.

BOOT agapan kan lokal na gobyerno kan Naga an ano man na kaso nin online sexual exploitation of children na posibleng magbutwa sa laog kan syudad siring kan mga nangyayari na ngonian sa manlaenlaen na parte kan kinaban.

Segun ki Vice Mayor Cecilia de Asis, ibobosol niya muna an sarong consultation meeting na imbitado an cyber-crime units kan mga law enforcement agencies, Department of Education, prosecution office asin ibang concerned government and private agencies.

Pigpahayag kan bise-alkalde na sarong ordinansa an nakatalaan pandayon kan Sangguniang Panlungsod na igwang katuyuhan na tawan nin magkakanigong kaaraman an lambang pamilyang Nagueño laban sa pagmolestya nin mga kaakian gamit an online, tamang pagkoordinar o pag-report sa mga awtoridad kan siring na mga kaso, pagpahiwas nin kaaraman dapit sa online sexual exploitation kan mga aki, asin an mga padusa o penalidad na hahampangon huli kan pagiging imbwelto sa siring na krimen.

Piggigibo ngonian an nasambit na plano pagkatapos kan sarong seminar na pig-atendiran kan besi-alkalde dapit sa online sexual exploitation sa mga kaakian.  An seminar pigbosol kan Juvenile Justice Mission, sarong ahensya na ipinaglalaban an karahayan asin buhay kan mga kaakian laban sa nasambit na krimen.

Pigsaysay ni de Asis na pigbuyagyag sa pig atendiran niyang seminar na mga paedophiles sa Amerika, Australia, asin Sweden an kadaklan sa mga imbweltong tao an nagdadalan kan mga video nin kaakian na ipinapaheling an mga maselan na parte kan saindang mga lumbod pang lawas.

Nasusog kan mga awtoridad na kadaklan sa mga videong pigpapaheling via online hali sa Pilipinas asin sa harong lang piggigibo.  Sinabi ni de Asis na igwang mga insidente na nagsosobli sana nin aki sa laog kan saindang komunidad an kagharong para magkawat, alagad, idto palan piggagamit na sa negosyo sa paagi nin online sexual child exploitation.

Pag-abot sa barayadan, sinabi ni de Asis na pigpapadara na lang sa paagi nin online remittance an kwartang hali sa mga customers na paedophiles sa taong nagsu-supply kan video.  Saro o duwang kaso nin siring na transaksyon sa Bikol an nai-record na kan mga awtoridad.

(Jason B. Neola, CEPPIO)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph