Edit
NAGA CITY GOVERNMENT

City News

City of Naga, Bikol, Philippines : Today is  September 26, 2022

Bike-to-school program padagos na pigbobosol kan syudad

SI NCBB Program Coordinator Hernandez, katiwala kan LGU Naga sa mga bike programs na pigbobosol ni Alkalde Nelson Legacion. JBN/CEPPIO

TANGANING matawan nin kagianan an mga estudyantes sa saindang pag-report sa mga eskwelahan na daeng gayo magagastosan sa plete, pinagmarhay kan Naga City Bicycle Board (NCBB) na enkaminaron an mga para-adal na magbisikleta.

Segun ki Jonathan Hernandez, program director kan NCBB kan syudad nin Naga, na pig enot ninda sa paglaag nin mga bike racks arog kan yaon sa Camarines Sur National High School (CSNHS), sa CSNHS Liboton Campus, asin sa tinampo kan Barangay Peñafrancia. 

Lalagan pa man nin mga bike racks an Sta. Cruz National High School, an Tinago High School asin iba pang mga public schools na naghahagad nin mga lugar na mapaparadahan nin bisikleta sa laog kan saindang mga campus.  

Parte kan Bike-to-school program an paglaag pa nin mga bike racks sa iba pang mga eskwelahan.  Pigpahayag kaini na nadidipisilan an mga estudyantes, orog na idtong mga yaon sa upland barangays na kinakaipuhan pang magbyahe o maglakaw nin pirang kilometro tanganing sanang makapag-atendir nin klase.

Tanganing makasobli nin bike na pwedeng gamiton sa pagklase, sinabi ni Hernandez na pasyaran lang an saiyang opsina sa City ENRO asin magdara nin certificate of indigency. An nasambit na progama piggigibo tanganing makatao nin tabang sa mga residentes na kulang an ganansya sa tahaw kan nagpaparadugang na presyo kan petrolyo

(Jason B. Neola, CEPPIO)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph