NAGA CITY GOVERNMENT

City News

City of Naga, Bikol, Philippines : Today is  September 24, 2022

Bamboo floaters epektibo sa pagtipon nin basura

MGA makokolor na confetti na pigsabwag sa ladawan kan Mahal na Ina gikan sa Colgante bridge mantang nag-aagi an pagoda banda 4:55 nin hapon, Setyembre 17.
MGA makokolor na confetti na pigsabwag sa ladawan kan Mahal na Ina gikan sa Colgante bridge mantang nag-aagi an pagoda banda 4:55 nin hapon, Setyembre 17.

PADAGOS na pigpupugulan kan City Environment and Natural Resources Office (City ENRO) an mga naglataw na basura sa Naga river na atongon paluwas sa Bicol river, lalo na an mga plastic bottles asin confetti hale sa mga nagdalan kan Fluvial procession kan Sabado, Setyembre 17.

Segun ki Engr. Dan Cea, project coordinator kan Forest In Our Midst program, dae na pigpahale pa kan City ENRO an mga bamboo floaters sa irarom kan Tabuco asin Sabang bridges, mga tulay sa salog kan Naga na dae kabale sa ruta kan pagoda.

Pigsabi ni Cea, bago pa gibuhon an Fluvial procession kan Sabado, Setyembre 17, pigsapwat na kan River Management Unit kan Pollution Division kan opisina hale sa irarom kan salog an mga basura na dati nang pig-apon sagkod na maglataw an mga ini.

Paliwanag ni Cea, oras nin low tide pig-aatong kan salog an mga solid waste sa Naga river paluwas sa Bicol river alagad huli kan bamboo floaters, nababagat an mga basura asin natitipon.

Dugang ni Cea, nababagat asin natitipon man kan bamboo floaters an mga basura na pig-aatong kan Bicol river palaog sa Naga river sa oras nin high tide.

(Paulo S. Delos Santos, CEPPIO)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph