PADAGOS sagkod Setyembre 10 sa Holy Cross Parish, Barangay Tabuco, syudad nin Naga an registration para sa mga voyadores na mawot magsagwan sa Fluvial procession sa Setyembre 17.
MAOGMANG pigpasalamatan ni dating Besi-Presidente Leni Robredo an syudad nin Naga sa padagos na pagromdom kaini sa death anniversary kan saiyang esposo, dating DILG secretary Jesse M. Robredo.
MAOGMANG ipinahayag ninda Alkalde Nelson Legacion (representado ni Vice Mayor Cecilia de Asis) asin Arsobispo Rolando Tirona kan Caceres sa mga debotos kan Mahal na Ina, Our Lady of Peñafrancia na an selebrasyon kan saiyang kapyestahan ngonian taon 2022, kabali na an pagbosol kan traslacion asin fluvial procession, gigibohon ngonian na taon siring kan enot pang mga selebrasyon, alagad, sa irarom nin mga panundon asin health protocols.
Huli kan kamawotan na syertohon an pagpangataman sa paz y orden sa tahaw kan kasibutan dara kan pagselebrar kan Peñafrancia fiesta, pigmarhay kan gobyerno lokal kan Naga asin kan Naga City Police Office (NCPO) na hagadon sa liderato rehiyunal kan Philippine National Police na padarahan an syudad nin augmentation force.
PASADO sa Sangguniang Panlungsod an resolusyon ni City Councilor Ghiel Rosales na nagmamawot na pangarogan an lokal na gobyerno, Archdiocese of Caceres, business sector asin civil society groups sa environmental responsibility sa Peñafrancia fiesta.
PIGPOPOONAN nang bilogon kan Solid Waste Management Office an mga estudyanteng volunteers asin pag-iriba sa Informal Waste Sector bilang parte kan pag-andam para sa marikas asin lagduan na pagponpon nin basurang dara kan mga darakulang events kan Peñafrancia fiesta.
LABING sarong bulan bago an kapyetsahan kan mahal na Ina, nag-abiso na si Market Superintendent Ramon Florendo sa mga motorista na ookuparon kan street vendors an parking space kan Naga City People’s Mall, sa J. Hernandez Ave., sa Setyembre 15 sagkod 17 nin banggui.
AARAMON kan Committee on Consumer Protection kan Sangguniang Panlungsod kan Naga an rason kun taano ta pirming halangkaw an presyo kan karneng orig sa merkado. Huli kaiyan, gigibohon kan nasambit nang committee an sarong meeting kaibanan an mga stakeholders sa industriya nin orig.
PASADO na sa second reading kan Committee on Peace and Order, Public Safety and Disaster Management an pigpoproponir na ordinansa na iyo an magigin basehan kan syudad sa gigibohon na road clearing operations kaini.
