NAGA CITY GOVERNMENT

City News

City of Naga, Bikol, Philippines : Today is  August 15, 2022

Anti-rabies campaign kan CVO

ANTI-RABIES VACCINATION. Katuwang an nagkakapirang volunteers, padagos na pigtatawan nin dalan kan City Veterinary Office an kampanya kontra sa makangirhat na rabies. An retrato pigkoa kan Marso 26, 2022 durante kan pag obserbar kan Rabies Awareness Month. (REY BAYLON, CEPPIO)
ANTI-RABIES VACCINATION. Katuwang an nagkakapirang volunteers, padagos na pigtatawan nin dalan kan City Veterinary Office an kampanya kontra sa makangirhat na rabies. An retrato pigkoa kan Marso 26, 2022 durante kan pag obserbar kan Rabies Awareness Month. (REY BAYLON, CEPPIO)

Pagkatapos na temporaryong saraduhan an kampanya sa house-to-house anti-rabies vaccination, liwat na pigbobosol ngonian kan City Veterinary Office (CVO) an mahiwas na stray dog asin cat catching o an pagdakop sa mga layas na ayam asin ikos.

Pigpagiromdom ni Dr. Junios Elad, hepe kan CVO, an mga pet owners na bawal, susog sa Section 5 kan RA 9482 o Anti-Rabies Act, na pabayaan na magpara ikot-ikot an mga ataman na hayop sa luwas kan saindang mga harong o natad.

“Kaipuhan igakod asin dae pabayaan na magpara balawbagaw sa mga tinampo o arin man na public place an saindang mga ataman, enot, tanganing mailikay mismo sinda sa peligro, asin ikaduwa, mailikay man an iba, tao man o hayop, sa saindang mga ataman na posibleng carrier nin rabies virus,” sabi kan beterinaryo.

Igwa nin duwang kaso nin rabies sa ido an nairehistro poon kan Enero sagkod Hulyo, ngonian na taon, alagad sinabi ni Elad na dae kaipuhan maging kampante an gabos huli ta nakakagadan an rabies asin nagiging bayolente, nangingisog asin nakakapay an taong infected nin rabies.

(Jason Neola, CEPPIO.)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph