Sa kamawotan na likayan an padagos pang pag-ulanto kan presyo nin karneng orig sa ciudad nin Naga asin maipaotob an preciong oyon sa meat vendors asin consumidores, pigmarhay ni Alkalde Nelson Legacion na magbilog nin working committee tanganing adalan kun paano papababaon an farm gate price kan orig.
An halangkaw na farm gate price an pigtutukdo na rason kan halangkaw na presyo kan nasambit na produkto sa piggibong public consultation kan mga local pork industry stakeholders. An consultation piggibo kan Huebes, Feb. 11, sa kahagadan kan mga parabakal ki Alkalde Nelson Legacion.
Mayor na kawsa kan paglumpat sa precio kan buhay na orig o farm gate price an paglaog sa ciudad asin sa mga pagtaraed na banwaan kan mga parabakal nin orig hale sa ibang rehiyon. Pigsabi kan mga local meat dealers asin vendors na halangkaw na marhay an preciong pigoopresir kan mga byahero sa mga local hog raisers.
Pigsabi kan alkalde na kaipuhan kan LGU Naga na magpaluwas nin executive order o maninigong lakdang tanganing makagibo nin restriction o pagbawal sa mga byahero, alagad sa laog sana kan ciudad. Tanganing makahaman nin kaparehong aksyon sa mga banwaan, pigsabi ni Legacion na mas marhay kun maisakat sa lado kan probinsya an nasambit na isyu para sa mas mahiwas na aksyon.
Pigtukdo pa sa mga rason kan pagbawas sa supply kan buhay na orig an African Swine Fever.
An working committee nakatalan na mag-orolay liwat sa atyan na hapon tanganing isumitir sa alkalde an solosyon na saindang pighaman. An committee compuesto kan mga minasunod: Regional Technical Director Alex Templonuevo kan National Meat Inspection Service; Dr. Adelina Losa kan Department of Agriculture sa Bicol; Conrado Levina, presidente kan meat vendors sa Naga City People’s Mall; Dr. Esperanza Libunao kan Consumers Action Group, asin City Councilor Jose Perez.
