PADAGOS an Naga City Police Office asin an Public Safety Office sa paghaman kan saindang security plan bilang pag preparar sa pagroso kan dagmang na bisita sa mga kampo santo sa syudad nin Naga sa All Saints Day, Nobyembre 1 asin All Souls Day, Nobyembre 2.
Segun ki City Councilor Melvin Ramon Buenafe, chairman kan Committee on Peace and Order, Public Safety and Disaster Management kan Sangguniang Panlungsod, pighahalat na sana kan saiyang komite an security plan kan mga nasambit na opisina na piglalaoman na matapos duwang semana bago an pyestang kalag.
An plano iyo an mataong giya sa lokal na gobyerno sa pagpaotob kan mga polisiya asin pagmantenir kan paz y orden sa laog asin luwas kan mga kampo santo sa syudad, lalo na sa Naga City Public Cemetery sa Barangay Concepcion Pequeña kun saen nanutaran an magabat na trapiko kan tao asin lunadan.
Pigtawan-doon kan konsehal, mabwelta na sa kinatudan na paagi kan selebrasyon an mga tao sa paaboton na pyestang kalag kaya padagos an pagplano kan mga opisina sa magigin dalagan kan peace and order keeping sa mga kampo santo.
(Paulo S. Delos Santos, CEPPIO)
