Laen kan Special Mayor’s Permit hale sa lokal na gobyerno kan syudad nin Naga, an sarong firecracker vendor obligado man na magkoa pa nin License to Sell sa Regional Office kan Philippine National Police asin mag-atendir kan Fireworks Safety Seminar na tinatatao kan Bureau of Fire Protection (BFP) tanganing makapagtyenda kan nasabi nang produkto.
Laen kaiyan, pighahagad pa kan Task Force Paputok sa mga paratyenda na bawal an magpabakal nin siring na produkto sa mga menor de edad. An Task Force Paputok iyo an tinatawan poder kan lokal na gobyerno na mamahala sa pagpatyenda nin mga firecrackers o fireworks sa laog kan syudad kabali na an estriktong pag-implementar kan mga panundon para sa ligtas na selebrasyon nin Christmas asin Bagong Taon.
Sinabi ni Ramon Florendo, saro sa mga namamayo kan task force, na obligasyon kan mga paratyenda nin firecrackers na ibawal sa saindang lugar an pagsigarilyo kaibahan na an pagbawal sa siisay man na magsaray nin mga firecrackers sa mga harong o sa mga tindadahan na yaon sa Naga City People’s Mall.
Sinabi pa kaini na an mga paputok kaipuhan sabritan sa lugar na deklarado kan barangay bilang common display area asin bako sa kun saen sanang lugar sa barangay tanganing malikayan an kasulo o iba pang rimalaso.
Sa aga, aldaw nin Huebes, nakatalaan na magmeeting an 27 punong barangay kan Naga dapit sa common display area kan mga firecrackers.
(Jason B. Neola, CEPPIO.)
