Padagos na ibobosol kan syudad nin Naga an serye nin trainings sa Basic Life Support sa pagbunkaras kan taon 2023. Ini an pigpahayag ni City Councilor Joselito S.A. Del Rosario pagkatapos na hamanon an Memorandum of Cooperation kan syudad kaibahan an mga pribadong institusyon, asin mga ahensya nin gobyerno.
An training sa Basic Life Support saro sa mga lakdang o estratihiya kan syudad nin Naga tanganing matawan nin magkakanigong kaaraman an mga Nagueño asin mga institusyon sa laog kan Naga dapit sa disaster preparedness asin pagiging andam sa panahon nin kalamidad.
Huli kan memorandum of cooperation kan syudad nin Naga sa mga pribadong eskwelahan (AdNU, USI, NCF, UNC), Department of Education, Bureau of Fire Protection, PNP, Liga ng mga Barangay, Sangguniang Kabataan Federation, piglalaoman na magiging mas makusog pa an kampanya para sa kaligtasan asin seguridad kan mga Nagueño kun igwa nin rimalaso.
Iyan nin huli ta magkakaigwa nin mas mahiwas na partisipasyon an mga Nagueño sa mga programa kan LGU Naga na nagmamawot nin kaligtasan asin seguridad para sa siisay man na yaon sa laog kan syudad.
(Jason B. Neola, CEPPIO.)
