KABALI sa proposed 2023 General Appropriations Act (GAA) na nakatalaan aprobaran ngonian na semana sa Senado asin Kongreso an P900 million na pundo para sa pagpahaman kan Center for Safety and Resiliency (CeSaR) sa Balatas New Development Area asin kan convention center na papatindogon sa Barangay Carolina.
Pigsaysay ni Alkalde Nelson Legacion na kan enot pa igwa nang pigdesponir na P45-M an syudad nin Naga para sa CeSaR asin an mga patrabaho na gagastusan kan nasambit na pundo ipinagtalaan na an bidding. Ipinahayag kan alkalde na pigsumitir na ninda an building design kan edipisyo bilang parte proseso.
Masunod sa P45-M iyo an P200-M na piglalaoman maitatao tolos sa syudad sa panahon na maaprobaran na kan mga senador asin kongresista an 2023 GAA kabali na an kwartang para sa convention center. An P900-M personal na pighagad ni Legacion sa mga opisina kan mga senador asin kongresista kan nakaaging mga bulan.
An convention center, na madara nin direct employment asin indirect employment sa mga taga-Naga, igwa nin espasyo na pwedeng mag-ako nin 3,000 sagkod sa 3,500 na tao susog sa sitting capacity kaini.
(Jason Neola, CEPPIO.)
