AN manlaenlaen na business establishments sa Magsaysay Avenue sa syudad nin Naga.
Pigheheling ngonian kan gobyerno lokal kan syudad nin Naga kun ano an bentahe na dadarahon sa mga Nagueño kan pagiging highly urbanized city kaini.
Ini an pigpahayag ni Alkalde Nelson Legacion sa atubangan kan prensa pagkatapos niyang ipahayag na kalipikado na an Naga na makaayon sa grupo kan mga highly urbanized cities kan Pilipinas.
Pigsaysay kan alkalde na kun hahagadon kan syudad sa gobyerno nasyunal na pormalmenteng ideklara an Naga bilang highly urbanized city, kaipuhan malinaw kun ano an mga benepisyong mareresibe kan Naga para sa mga Nagueño. “Sagkod na dae pa naililista o klarado kun ano an mga benepisyo para sa Naga, mas marhay na hold muna ang plano,” pahayag kan alkalde.
Base sa Local Government Code of 1991, kalipikadong magin highly urbanized city an sarong lugar kun igwa ini nin annual income na dae mababa sa P100-M o P1-B asin populasyon na dae mababa sa 200,000.
An pagiging highly-urbanized kan sarong syudad piggigibo sa paagi nin sarong deklarasyon kan Presidente kan Pilipinas asin aprobado sa sarong plebisito kan mga residentes.
Pigsasabi pa sa batas na sa panahon na magin highly urbanized city an sarong lugar, magkakaigwa ini nin sadiring representasyon sa Kongreso laen pa kan dugang na fundo sa IRA o National Tax Allocation.
Alagad, pigtawan du-on kan alkalde na kaipuhan magin klaradong marhay para sa syudad nin Naga an mga benepisyong kabaeng kan pagiging highly urbanized city.
(Jason Neola, CEPPIO. Retrato kua ni Kim Poñado, CEPPIO.)
