ANDAM na an Naga City District Abattoir sa dakulang volume nin mga bobonoon na orig sa maabot na Peñafrancia fiesta sa bulan nin Setyembre 2022.
Segun ki Roberto Acabado, an namamayo kan slaughterhouse, bago pa nangyari an pandemya kan taon 2020, 600 na an average na numero kan orig an saindang pigbobono sa laog sana nin 16 na oras na operasyon sa aldaw kan traslacion procession asin sa mismong aldaw kan kapyestahan pagkatapos sana kan fluvial procession.
Dae pa kabali sa numerong iyan an bilang kan pigbobonong mga kanding asin baka sa laog kan nasambit na mga aldaw.
Ipinahayag ni Acabado na igwang 40 skilled butchers an district abattoir na magtatarabang-tabang tanganing marikas na maidispatsa sa Naga City People’s Mall an mga pigbonong orig asin sa mga satellite markets na yaon sa mga barangay.
Nagtao nin asigurasyon an abattoir na mantenido kaini pirmi an pagpangataman sa mga ekipahe o gamit sa pagbuno asin paglinig kan mga carcass kan nasambit nang mga hayop.
Pigtawan du-on pa ni Acabado na katuwang ninda an mga meat inspectors kan Naga City Veterinary Office sa pagsiguro na salbado sa ano man na kontaminasyon an mga pigbonong orig siring man an pagiging fit for human consumption kan mga karne.
Padagos na pigpapaotob kan Naga City District Abattoir an hababang rates kan 2014 sa pagsingil sa mga nagpapabuno dawa na ngani yaon na sa Triple A Category an district abattoir na an boot sabihon an mga karneng gikan digdi pwedeng ibyahe sa ibang lugar huli ta syertong mantenidong marhay an kalinigan.
(Jason B. Neola, CEPPIO. Photo by Rey Baylon, CEPPIO.)
