NAGA CITY GOVERNMENT

City News

City of Naga, Bikol, Philippines : Today is  September 24, 2022

Linderos kan mga barangay gigibohon malinaw sa ordinansa

Councilor Joselito Del Rosario (sa wala) and Ex-Officio City Councilor Corazon Peñaflor (sa too).
Councilor Joselito Del Rosario (sa wala) and Ex-Officio City Councilor Corazon Peñaflor (sa too).

NAGTUTUBOD si City Councilor Joselito SA del Rosario na aaprobaran asin ipapaotob ni Alkalde Nelson Legacion an ordinansa na iyo an matao nin solusyon sa problema kan mga barangay dapit sa saindang mga linderos o boundary.

Sa laog kan syudad nin Naga, haros sampulong barangay an imbwelto sa boundary disputes na nagpoon pa kan taon 1962 o maabot na sa anom na dekada, alagad dae natatawan nin panahon tanganing maresolbiran.

Segun ki Del Rosario, mawot man kan alkalde na matapos na an isyu dapit sa linderos huli ta haloy nang panahon na dae ini natawan nin magkakanigong aksyon magin kan mga enot pang administrasyon.

Si Del Rosario, bilang pamayo kan committee on barangay disputes sa Sangguniang Panlungsod, asin Ex-Officio City Councilor Corazon Peñaflor, bilang presidente kan Liga nin mga Barangay, nagtuwang tanganing hamanon asin i-endorso an pagpasar kan ordinansa na yaon na ngonian sa lamesa kan alkalde tanganing pirmahan.

An mga barangay na imbwelto sa sinambit na problema sa boundary iyo an: Calauag, San Felipe, Sta. Cruz, Igualdad, Abella, Dinaga, Bagumbayan Sur, Bagumbayan Norte, Sabang, Triangulo, Lerma asin Liboton.

Pigsaysay ni Peñaflor, an punong barangay kan Barangay Calauag, na yaon ngonyan an syudad sa paghanap nin magkakanigong fundo tanganing gastusan an re-surveying kan mga daga na sakop kan nasambit na mga barangay tanganing magin malinaw kun saen man nanggad an location kan mga barangay boundaries.

(Jason B. Neola, CEPPIO.)

Share this

CITY EVENTS PROTOCOL AND PUBLIC INFORMATION OFFICE
G/F Roco Library Bldg., City Hall Compound, J. Miranda Ave., Naga City, Philippines
Tel. (54) 205-2980 local 2020
email: ceppio@naga.gov.ph