LIWAT magigin available an mga baratong Christmas gift items sa Plaza Quezon poon Disyembre 12, ngonian na taon sagkod Enero 3, 2023.
Ini an pigkunpirmar ni Efren Perez, Presidente kan City Smiles Vendors’ Association makalihis na tugutan sinda kan Sangguniang Panlungsod na makatinda sa Kinastilyohan St., hampang kan nasambit na plaza.
Segun ki Perez, labi an pasalamat kan grupo sa lokal na gobyerno, partikular na sa sanggunian huli sa pagtugot sainda na makatinda sa nakatalaan na mga petsa.
Naglalaom si Perez na makakabawi an saiyang asosasyon sa kalugian na pigwalat sainda kan pandemya na nagdara nin limitasyon sa hiro kan tao asin social gatherings arog kan Christmas parties kan mga aki sa eskwelahan.
Ngonian na padagos an full implementasyon kan face-to-face classes, pigtutugot na sa mga eskwelahan an Christmas parties kan mga estudyante kun saen nangyayari an exchange of gifts sabi pa ni Perez.
(Paulo S. Delos Santos, CEPPIO)
