BILANG kasimbagan sa dakol asin haloy nang nakakustodiya sa Naga City Halfway House sa City Hall Compound, pinagmarhay kan lokal na gobyerno na magpatugdok nin 2 storey-eight room na bagong Naga City Women’s Shelter sa Sitio Caromatig, Barangay Carolina.
Segun ki Vice Mayor Cecilia de Asis, founder kan Bantay Familia program, nag-abot na sa 20 kababaihan, na kliyente kan programa, an isinirong, pinoprotehiran asin inaaataman kan lokal na gobyerno sa hayapit asin dati nang eksistedo na halfway house.
Sinabi ni de Asis na an mga kliyenteng biktima nin pan-aabuso sa kanya-kanyang pamilya. Dae na husto sa duwang kwarto kan dati nang women’s center kaya nagtuturog an mga ini sa opisina kan center asin programa.
Pinagbendisyonan na an bagong establisamento na maserbing women’s shelter sa nasambit na barangay, kan Enero 17 alagad mayo pa nin kagamitan, magin pintura an interior asin exterior.
Huli digdi, nangapodan an bise alkalde sa mga Nagueño na may kakayahan na magtabang sa pagtaong kolor asin kagamitan sa bagong women’s shelter. Apwera digdi, nagpromesa si Mayor Nelson Legacion mapadapit sa fondo kan lokal na gobyerno para sa pagpapintura kan building.
Nagkakantidad P5 milyones an asistensyang pigtao ni Kongresista Gabriel Bordado Jr kan terser distrito kan Camarines Sur para sa pagpatugdok kan pasilidad.
(Paulo Delos Santos, CEPPIO.)
