TANGANING mainaan an numero kan backlog sa mga aplikante kan socialized housing projects kan lokal na gobyerno kan Naga, pigmarhay kan Housing and Settlement Committee kan Sangguniang Panlungsod na magkonduser nin updating sa Housing and Settement Development Office (HSDO) para sa eksaktong numero nin mga aplikantes na maninigong akomodaron sa mga eksistedong relocation site sa syudad kun saen may mga bakante pang lote.
Segun ki Konsehal Jesse Albeus, an bagong tukaw na chairman kan komiteba, dakulang angat an 6,000 sagkod 7,000 na aplikantes na kabale sa backlog kan nasambit na programa kaya piglalaoman na matalaan na sa masunod na semana an updating.
Mientrastanto, hagad kan mga opisyales kan Naga City Urban Poor Federation na magkonduser nin urban poor summit kun saen imbitado an mga ahensya kan gobyerno na may kinaaraman sa programang paharong para sa marikas na proseso kan pag-transfer nin titulo sa mga beneficiaries.
Sa presente mayo pa nin natatalaan na petsa para sa summit huli ta kaipuhan nguna kan konsehal na ikonsulta ini ki Alkalde Nelson Legacion.
