PIGHAHALAT na sana kan Naga City Little People’s Association an freezer gikan sa lokal na gobyerno tanganing poonan an livelihood program para sa mga persons with dwarfism sa Syudad nin Naga.
Segun ki Gregorio Balahibo, presidente kan asosasyon, sarong sadit na factory nin ice cream sa kalye Santiago III sa Barangay Peñafrancia an mabukas tanganing mag-employ nin mga little people sa syudad.
Aminado si Balahibo na sadit na insentibo asin minimum sana an sweldo kan mga beneficiaries, natural sa mapoon pa sanang establisamento nin negosyo na madepende sa sadit na gross sales.
Naglalaom si Balahibo na tangkilikon kan publiko an saindang ice cream na mapoon sa p12 an presyo depende sa size kan container.
Sa presente, limang flavours nin ice cream an andam nang gibuhon kan asosasyon para sa produksyon na kinababalehan kan ube, cookies and cream, mango, double dutch asin avocado.
