PIGMARHAY kan school administration kan Camarines Sur National High School (CSNHS) na tawan nguna nin psychological first aid an 11,500 na mga estudyantes ninda sa primerong apat na aldaw kan saindang pagbwelta sa klase.
Pigsaysay ni Sulpicio Alferez III, principal kan CSNH, na labi ka-importante an nasambit na training para sa mga kaakian na nag-atubang nin depisil na sitwasyon kan buhay huli kan pandemya sa laog nin halawig na panahon. An training igwa nin apat na modules manongod sa psychological first aid (PFA).
An psychological first aid training sarong lakdang tanganing matawan nin tabang an mga estudyantes na luhay-luhay makapag-andam kan saindang sadiri pasiring sa normal na buhay kasabay kan mga paghingowa na magin normal na an gabos dawa ngani dae pa tapos an pandemya na sobra na sa duwang taon ngonian.
“Boot nyato kayang matabangan an satuyang mga aki na makapag-cope up o makapag-adjust emotionally, mentally, asin psychologically sa nagpapadagos na sitwasyon ta ngonian,” sabi pa kan school principal.
Pigsaysay ni Alferez na igwang mga mamundong sitwasyon na pig-agihan sinda kan mga panahon na halangkaw na marhay an kaso o bilang kan transmission kan Covid-19 na nagdara nin maraot na epekto sa kaakian siring kan kaso nin depression.
Segun pa sa school principal, pagkatapos kan apat na aldaw na PFA training, tatawan man nin mga magkakanigong kaaraman an mga estudyantes dapit sa disaster risk management.
(Jason B. Neola, CEPPIO.)
