NAGPAGIRUMDOM si City Councilor Joselito Del Rosario, myembro kan Transport Committee kan Sangguniang Panlungsod sa mga trimobile drivers sa syudad nin Naga na maninigong ibaba an singil sa pasahero.
Ini katakod kan pagsingil kan nagkapirang trimobile drivers sa syudad nin P15 kada pasahero sa ibong kan pigpapasunod na City Ordinance No. 2022-071 na nagpapasunod sa fare reduction sa pamasahe sa trimobile.
Susug sa ordinansa, P13.00 na an regular fare mantang P10.50 sa mga estudyante, senior citizen, persons with disability asin solo parents.
Segun ki Del Rosario, pigtutugutan na an apat na passenger capacity kada unit nin trimobile mantang face-to-face na an klase kan mga estudyante kaya rasonable an presenteng presyo kan pamasahe.
(Paulo S. Delos Santos, CEPPIO)
