Laog sa 1,402 na personahe kan Philippine National Police gikan sa manlaenlaen na probinsya kan rehiyon Bikol an nag-abot sa syudad nin Naga kan Miyerkules, Setyembre 7, tanganing magtabang sa pagmantenir kan pagiging trankilo asin kan marhay na kamugtakan kan syudad sa pagselebrar kan Peñafrancia fiesta.
An regional fiesta na pigdadayo nin sobra sa sarong milyon na debotos, peregrino, turista, asin mga balikbayan hali sa ibang rehiyon kan Pilipinas asin sa luwas kan nasyon, tradisyunal na pigseselebrar sa Naga asin pigbibistong pinakadakulang Marian festival sa Asia.
An ayudang augmentation force pighagad kan Naga City Police Office (NCPO) sa Police Regional Office 5 laen pa kan mga personahe kan Philippine Army, Philippine Air Force, Philippine Navy, Philippine Coast Guard, Public Safety Office personnel asin iba pang grupo nin force multipliers sagkod volunteers.
Nangapudan si Police Lt. Col. Errol Garchitorena, deputy city director for operations kan NCPO, na parte kan saindang pagtao nin seguridad iyo an pagpaotob kan polisiya na dapat magkoa nin permit an siisay man na operator na igwang planong magpagpalupad kan saindang mga drones sa tahaw kan mga kasirubtan na dara kan Traslacion Procession, Bicol Regional Military Parade, Civic Parade, Fluvial Procession, asin kadakol pang iba.
(Jason B. Neola, CEPPIO)
