Andam na an lokal na gobyerno kan syudad nin Naga para sa hog repopulation program o an pagpapadakol liwat nin mga orig tanganing masimbagan an pangangaipuhan sa mga pork products kan syudad.
Pigsaysay ni Frank Mendoza, acting city agriculture officer, na pighahalat na lang kan syudad an resulta kan piggibong serye nin examinations sa mga blood samples hali sa sentinel pigs na pigdistribuer sa mga hog raisers sa laog kan Naga.
An blood examinations sarong proseso tanganing madeterminaran kun positibo sa virus o sa helang na African Swine Fever (ASF) an mga orig sa laog kan syudad. An resulta kan sinambit na examinations an magigin basehan sa pagdeklara kun ASF-free na an syudad.
Labi sa 100 na sentinel pigs an pigwarak kan Department of Agriculture sa mga local hog raisers katakod kan programang “Bantay ASF” o “Babay ASF sa Barangay.” An mga sentinel pigs pig obserbaran sa laog nin 90 aldaw asin mayo man nin senyales na nag-positibo sinda sa ASF. Para makapag-siyerto, pigmarhay na eksamenon man giraray an saindang mga dugo.
Naglalaom an City Agriculture Office na marhay an magiging resulta kan blood examination tanganing dagos nang maideklarang nasa green status an syudad o ASF-FREE.
(Jason B. Neola, CEPPIO)
