TANGANING orog pang mapangatamanan an mga hobenes laban sa bullying, cybercrime, asin iba pang krimen, pinagmarhay kan administrasyon kan Camarines Sur National High School (CSNHS) na isairarom sa serye nin orientation programs an saindang mga estudyantes.
Ipinahayag ni Sulpicio Alferez III, CSNHS principal, na laen kan pagpasabot kan school policies, pigtatawan pa ninda nin kaaraman an mga junior asin senior high school students dapit sa mga bagay na makakatao sainda nin kaligtasan tanganing malikayan na magin biktima nin krimen, orog na sa parte kan kababaehan, siring kan mga kaso nin biglang pagkakawara na nangyayari ngonian na mga panahon.
Kabali sa mga resource speakers sa piggigibong orientation iyo an mga personahe kan Naga City Police Office na pigtutukduan an mga estudyantes dapit sa magkakanigong pag-andam, pag-apod nin tabang, asin paglikay.
Parte kan mga hiro na nagmamawot na ilikay an mga estudyantes sa siring na kapahamakan, sinabi kan school principal na hinahahadoy ninda an mga estudyantes na gibohon na lang sa laog kan campus an saindang mga aktibidad dawa sa aldaw nin Sabado o Domingo. Segun ki Alferez, papabantayan niya sa sarong maestra o maestro an mga aki myentras nagpapraktis o naggigibo kan saindang aktibidad.
Sinabi pa kaini na nahihiling niya kaya an saindang mga estudyantes sa laenlaen na lugar dawa banggi na asin sibot pa sa pagpraktis kan inaandaman na mga school activities.
(Jason B. Neola, CEPPIO.)
