MAOGMANG ipinahayag ninda Alkalde Nelson Legacion (representado ni Vice Mayor Cecilia de Asis) asin Arsobispo Rolando Tirona kan Caceres sa mga debotos kan Mahal na Ina, Our Lady of Peñafrancia na an selebrasyon kan saiyang kapyestahan ngonian taon 2022, kabali na an pagbosol kan traslacion asin fluvial procession, gigibohon ngonian na taon siring kan enot pang mga selebrasyon, alagad, sa irarom nin mga panundon asin health protocols.
Sa pigpirmahan nindang joint statement, nagkasundo an duwang lider na itogot an piggibo kan gabos na mga civic asin religious events na konektado sa Peñafrancia fiesta sa lindong kan Covid Alert Levels 1 asin 2.
Ipinahayag pa ninda sa joint statement na bukas sa publiko an pagpahayag nin pagkamoot asin debosyon sa Mahal na Ina asin Divino Rostro sa paagi nin pagbisita sa mga simbahan, siring man an pag atendir kan banal na misa asin pag-ayon sa mga prusisyon. Alagad, dae pa itinutugot an paghadok asin pagkapot sa arin man sa mga imahen.
Pigtawan du-on sa dokomento na an mga mapartisipar sa selebrasyon kan pyesta sa syudad nin Naga kaipuhan otobon an mga minasunod na kondisyon:
- Si mga taong yaon sa edad 50 anyos pataas kaipuhan nagresibe na sinda kan saindang ika-duwang booster shots.
- Idtong yaon sa edad na 18 hanggan 49 kaipuhan igwa na nin first booster, asin
- 5-11 years old kaipuhan fully vaccinated
An Naga City Vaccination Center andam na gibohon kumpleto an pangangaipuhan sa bakuna sa paagi kan vaccination na piggigibo sa SM City Naga poon Miyerkules hanggan Domingo, alas 10:00 nin aga sagkod 5:00 nin hapon.
Ibobosol man kan syudad an vaccination sa mga simbahan asin malls sa laog kan Naga poon Agosto 24 hanggan Setyembre 4, 2022.
Nangapudan pa man an syudad asin an simbahan sa mga LGUs sa kabikolan sa paagi kan joint statement na gibohon nang lagduan an pagtao nin booster vaccination sa mga debotos kan Mahal na Ina asin palakopon an joint statement sa saindang mga konstituentes para sa saindang partisipasyon sa selebrasyon kan pyesta.
Sarong working group an maggibo nin polisiya tanganing mapamahalaan nin toltol an pagpadalagan kan mga prusisyon poon sa pagdakit kan imahen kan Mahal na Ina asin El Divino Rostro haleng Plaza de Covarrubias (Peñafrancia shrine) pasiring sa Naga Cathedral sa Setyembre 9, asin haling Cathedral pabalik sa Basilica sa September 17.
Pigtawan du-on kan Peñafrancia Fiesta Working Group an mga minasunod:
- Dae pa tapos an pandemya kun kaya kaipuhan sundon an mga health guidelines and protocols na pigpapaotob kan gobyerno
- Kaipuhan an pirming pagsu’lot nin face mask orog na kun yaon sa mga civic asin religious activities.
- Mga miyembros lang kan Cofradia de San Jose an pigtutugot na magpasan/magdara kan imahen kan Divino Rostro asin kan mahal na Ina.
Pig eenkaminar an mga deboto na maglinya sa gilid kan mga tinampong aagihan kan prusisyon dara an saindang mga rosaryohan, puting panyo, kandilang igwa nin sulo, asin mga burak. An mga deboto asin an saindang mga religious articles bebendisyunan kan mga padi sa saindang pagtongod o pag-agi sa saindong pigkakamugtakan.
(Jason B. Neola, CEPPIO)
