Maogmang pig-alok ni Miss Bicolandia 2022 Rheema Adakkoden an mga Bikolano na magbisita sa piggigibong Best of Bicol event ngonian na aldaw tanganing dae masayang an oportunidad na maaraman an mapapadapit sa mga bagong produkto na bunga nin Bicolano ingenuity.
Sinabi ni Ms. Adakkoden na nakakaogma asin nagtatao nin excitement an mga exhibits asin trade fair huli kan mga bagong health and beauty products kabali na an mga bagong teknolohiya sa pagluto o cooking equipment, mga bago sa lado nin accommodations, mga bagong tour packages asin dakol pang iba na pig oopresir kan mga Bikolano sa lado nin turismo asin negosyo.
An Best of Bicol na nagpoon ngonian na aldaw sa SM City Naga, gigibohon sagkod sa Oktubre 10, asin igwa nin 45 exhibitors na preparadong magpaheling kan saindang mga bagong produkto asin serbisyo.
Pigtawan du-on kan beauty titlist na mas mapaparikas asin mapapagayon an paglakaw pasiring sa normal na buhay, dawa igwa nin kapisilan na pig aatubang, kun an gabos magiging magkaturuwang asin magdadaramayan sa tahaw kan pandemya.
Pigsaysay kan Miss Bicolandia na padagos niyang hahagadon na an mga aktibidad na siring kan Bicol Business Month pirming magkaigwa nin panahon na mangyari para sa kauswagan kan kagabsan.
(Jason B. Neola, CEPPIO.)
