Gabos na nagtatrabaho sa pribadong establisemyento asin pampublikong opisina kaipuhan bakunado.
Ini an pighahagad kan panundon na pigpaluwas ngonian na aldaw, Disyember 13, ni Alkalde Nelson Legacion asin Dr. Vito Borja, chairman kan Health Emergency Response Task Force kan syudad nin Naga.
Pigtatawan pa nin du-on sa New Localized Guidelines na an mga unvaccinated workers o habong magpabakuna pwedeng togotan na magtrabaho sa saindang workstations kun igwa sindang maipepresentar na negative RTPCR o Antigen Test kada ika-14 na aldaw. An empleyado mismo an ma-gastos kan saiyang pagpa-test.
Kun dae pwedeng magpabakuna an sarong trabahante, kaipuhan siyang magpaheling nin medical clearance hale sa sarong government health office bilang valid proof na dae siya pwedeng magpabakuna.
An guidelines o panundon para sa paglaog nin tao sa public and private establishments, simbahan asin mga pampublikong lugar (para magtrabaho o magpasyar) nagsasabi pa na an gabos na partially vaccinated employees na matrabaho sa saindang mga workstation dae kaipuhan pang magsairarom sa regular RT PCR test na sinda an ma-gastos, kun an second dose kan bakuna dae pa man napapanahon na itao saiya.
An mga personang yaon sa edad 12 anyos sagkod pataas totogotan na maglaog sa public and private establishments asin places of worship kun sinda bakunado. Sa mga taong edad poon 11 anyos sagkod pababa, totogotan sinda na magluwas sa harong asin maglaog sa pampubliko asin pribadong establisemyento kun kaibahan ninda an saindang magurang o guardian na bakunado na. An mga aki na may edad poon 3 taon sagkod pataas kaipuhan nakasulot nin face masks.
Pigsasaysay pa sa panundon na oobligaron kan mga establisemyento asin lugar nin pagsamba (simbahan) na magpaheling nin vaccination card an gabos na eligible persons (12 years old and above) bago makalaog sa edipisyo.
Pigsusugo man sa paagi kan guidelines an Naga City Police Office, Public Safety Office, City Disaster Risk Reduction Management Office, Barangay Officials, asin Tanods asin mga pigmimidbid na mga force multipliers na syertuhon an pagpaotob kan mga panundon. Kaibahan na an paggibo nin mga random inspections kan vaccination cards.
Pighahagad pa sa NCPO na maggibo nin orientation para sa mga security guards para sa pagpapaotob kan mga reglamentos.
