Dawa na ngani mayo na nin report sa mga panahon na ini manongod sa insidente nin African Swine Fever (ASF), pigmarhay man giraray kan Department of Agriculture (DA) asin kan lokal na gobyerno kan syudad na magdistribuer nin sentinel piglets sa mga hog-raisers.
Segun ki Junios Elad, veterinary doctor asin pamayo kan City Veterinary Office (CVO), 108 na mga sentinel piglets an pigpanao sa mga saradit na para-ataman nin orig.
Sa paagi kan sentinel piglets pwedeng masyerto o madeterminaran kun igwa nanggad nin kaso kan ASF sa laog kan syudad. Pinakahuring bareta dapit sa pagbunkaras kan ASF sa laog kan Naga nangyari kan Enero 2020.
An piglets pigpana-o kan Hulyo 1, ngonian na taon, asin nakatalaan na ipapasairarom sa constant monitoring sagkod sa mag-abot sa 48 na aldaw na nakatalaan magtapos sa Agosto 10. Pigsaysay ni Elad na igwa sindang mga gigibohon na reports dapit sa mga piglets na nakatalaan isumitir kan CVO sa DA.
An sentinel piglets distribution sarong pangenot na aksyon pasiring sa liwat na pagpapadakol nin mga orig sa laog kan syudad o swine repopulation program na igwang katuyuhan na mamantenir an supply asin presyo kan orig sa laog kan Naga.
(Jason Neola, CEPPIO.)
